وحدة تخزين حمام 40×35 سم-FNH32

طلبت وحدة تخزين الحمام ضمن أوردر من ٤ منتجات بخصم ١٠٪ بمناسبة شهر نوڤمبر ٢٠٢٢. كان عاجبني ان مكتوب تفاصيل المقاسات عشان بحب أقيس على المكان عندي قبل الشراء عشان المنتج يظبط كويس في مكانه بدون مفاجأت سخيفة، لكن للأسف المقاسات في الواقع بتختلف. المقاسات الفعلية: عرض ٣٥ سم، طول ٣٧ سم. إرتفاع الوحدة بدون الأرجل ١٦٥ سم. ٥ أرفف + الأرضي، إرتفاع بين الأرفف ٢٦ سم، عمق الأرفف الداخلي ٣٣ سم. خامة الخشب جيدة، الدهان الأبيض ملطخ وفيه نُقر محتاج وش دهان تاني لتتقيل اللون وتمويه حركة فرشة الدهان. حلية مقبض الباب مختلفة عن الصورة. حلية تثبيت الأرفف لونها بني وشكلها وحش والمفروض انها تتقفل على نفسها تداري المسامير بس مش كلهم بيقفلوا. الأرجل بلاستيك خامة رديئة جداً، واتخلعت من مندوبين التوصيل وهما شايلينها ومعووجة، شيلتهم وجبت من ميدان الجامع ٤ رجول الواحدة بـ ٢٥ جنيه وركبتهم عملوا فرق شاسع وخلوا الوحدة ثابتة كويس على الأرض وشكلها أقيم. وصلتني بعد ١٩ يوم من عمل الأوردر لوحدها بدون باقي المنتجات. تكلفة شحن الأوردر كله كانت ٦٠٠ جنيه، زائد إكرامية أفراد التوصيل على ٣ مرات توصيل × ٢ مندوبين لكل توصيلة. سعرها كان ٣٥٥٥ جنيه وبعد الخصم ٣٠١٨ جنيه. والحقيقة بجودة التقفيل والأرجل البشعة كان يبقى آخرها ٢٠٠٠ جنيه كفاية جداً.